ભારતીય બેડમિન્ટન ખેલાડી સાયના નેહવાલે તેના પતિ પારુપલ્લી કશ્યપથી અલગ થવાનો નિર્ણય લીધો છે. તેણે તેની ઇન્સ્ટાગ્રામ સ્ટોરીમાં  દ્વારા આ માહિતી આપી હતી. તેણે લખ્યું, ‘ઘણા વિચાર કર્યા પછી, કશ્યપ અને મેં અલગ થવાનો નિર્ણય લીધો છે, જીવન ક્યારેક આપણને અલગ અલગ દિશામાં લઈ જાય છે. અમે એકબીજા માટે શાંતિ અને ઉન્નતિ પસંદ કરી રહ્યા છીએ. હું તેની સાથેની બધી યાદો માટે આભારી છું અને ભવિષ્ય માટે તેને શુભકામનાઓ પાઠવું છું. અમને સમજવા અને આદર આપવા બદલ આભાર.’

જણાવી દઈએ કે સાયના નેહવાલે 14 ડિસેમ્બર, 2018ના રોજ કશ્યપ પારુપલ્લી સાથે લવ મેરેજ કર્યા હતા. બંને 2007થી રિલેશનશિપમાં હતા.તેઓ 2005થી એકબીજાને ઓળખતા હતા. કારકિર્દીના શરૂઆતના દિવસોમાં બંને હૈદરાબાદની પુલેલા ગોપીચંદ એકેડેમીમાં સાથે તાલીમ લેતા હતા.

સાયનાએ હૈદરાબાદ સ્થિત તેના ઘરે લગ્ન કર્યા. લગ્નમાં ફક્ત પરિવાર અને નજીકના મિત્રો જ હાજર રહ્યા હતા. બંનેએ 16 ડિસેમ્બર, 2018ના રોજ હૈદરાબાદની નોવોટેલ હોટેલમાં તેમના લગ્ન રિસેપ્શન પાર્ટીનું પણ આયોજન કર્યું હતું.

ઓલિમ્પિક મેડલ જીતનાર પ્રથમ ભારતીય બેડમિન્ટન ખેલાડી

સાયના નેહવાલ ઓલિમ્પિક મેડલ જીતનાર પ્રથમ ભારતીય બેડમિન્ટન ખેલાડી છે. તેણે લંડન ઓલિમ્પિક-2012માં ભારત માટે બ્રોન્ઝ મેડલ જીત્યો હતો. તે 2015માં મહિલા સિંગલ્સ રેન્કિંગમાં વિશ્વની નંબર-1 ખેલાડી હતી.

સાયના બેડમિન્ટનમાં વિશ્વ નંબર-1 રેન્ક પ્રાપ્ત કરનારી એકમાત્ર મહિલા ભારતીય ખેલાડી છે. તેણે 3 ઓલિમ્પિક રમતોમાં ભારતનું પ્રતિનિધિત્વ કર્યું છે. સાયનાએ 2010 અને 2018 કોમનવેલ્થ ગેમ્સમાં ગોલ્ડ મેડલ જીત્યા હતા.

2008માં, સાયનાએ બેડમિન્ટન વર્લ્ડ ફેડરેશન (BWF) વર્લ્ડ જુનિયર ચેમ્પિયનશિપ જીતીને હેડલાઇન્સ બનાવી. તે જ વર્ષે તેણે પ્રથમ વખત ઓલિમ્પિકમાં ભાગ લીધો. તે ઓલિમ્પિક ક્વાર્ટર ફાઇનલમાં પહોંચનારી પ્રથમ ભારતીય મહિલા બની.

તેણે હોંગકોંગની તત્કાલીન વિશ્વ નંબર-5 વાંગ ચેનને હરાવી, પરંતુ ઇન્ડોનેશિયાની મારિયા ક્રિસ્ટિન યુલિયાન્ટી સામે હારી ગઈ. 2009માં સાયના BWF સુપર સિરીઝ ઇવેન્ટ જીતનાર પ્રથમ ભારતીય બની. સાયનાને 2009માં અર્જુન એવોર્ડ અને 2010 માં રાજીવ ગાંધી ખેલ રત્ન એવોર્ડથી નવાજવામાં આવી.

પારુપલ્લી કશ્યપ તેલંગાણાના હૈદરાબાદના રહેવાસી છે. તેણે 2014 કોમનવેલ્થ ગેમ્સમાં ગોલ્ડ મેડલ જીત્યો હતો. 32 વર્ષમાં કોઈ ભારતીય બેડમિન્ટન ખેલાડી દ્વારા કોમનવેલ્થ ગેમ્સમાં આ પહેલો મેડલ હતો.

કશ્યપ ભૂતપૂર્વ ઓલ-ઈંગ્લેન્ડ ચેમ્પિયન પ્રકાશ પાદુકોણ અને પુલેલા ગોપીચંદ બંનેના વિદ્યાર્થી રહી ચૂક્યા છે. તે 2012માં ઓલિમ્પિકના ક્વાર્ટર ફાઇનલમાં પહોંચનાર પ્રથમ ભારતીય પુરુષ બેડમિન્ટન ખેલાડી પણ છે.

2013માં, કશ્યપ વિશ્વ રેન્કિંગમાં છઠ્ઠા ક્રમે હતો. આ તેની કારકિર્દીનો સર્વોચ્ચ ક્રમ હતો. જોકે, વારંવાર થતી ઇજાઓને કારણે, તે લાંબા સમય સુધી આ સ્થાન પર ટકી શક્યો નહીં.

,