હવામાન વિભાગની આગાહી અનુસાર રાજ્યમાં વરસાદી માહોલ રહેશે. આજે કેટલાક વિસ્તારમાં ધોધમાર વરસાદ વરસી શકે છે. આગામી 7 દિવસ રાજ્યમાં હળવાથી ભારે વરસાદની શક્યતા વ્યક્ત કરવામાં આવી છે. એમાં પણ દક્ષિણ ગુજરાત અને સૌરાષ્ટ્રમાં ભારે વરસાદની આગાહી કરવામાં આવી છે. આગામી 24 કલાકમાં જ ધોધમાર વરસાદ ખાબક્યો છે.

હવામાન વિભાગની આગાહી અનુસાર દક્ષિણ ગુજરાતના 5 જિલ્લામાં ઓરેન્જ એલર્ટ, સૌરાષ્ટ્રના 6 જિલ્લામાં યલો એલર્ટ આપ્યું છે. જેમાં નવસારી, વલસાડ, ડાંગ, તાપી અને સુરતનો સમાવેશ થાય છે. તો સૌરાષ્ટ્રમાં અમરેલી, ભાવનગર, દ્વારકા, પોરબંદર, જૂનાગઢ અને ગીર સોમનાથનો સમાવેશ છે.

તો એવી પણ સંભાવના છે કે અમદાવાદમાં ગાજવીજ સાથે હળવાથી મધ્યમ વરસાદ થશે. હવામાન વિભાગે કાલથી એટલે કે 23થી 26 જુલાઈ સુધી માછીમારોને દરિયો ન ખેડવા સૂચના આપી છે. મહત્વનું છે કે, રાજસ્થાન પર મોન્સૂન ટ્રફ સક્રિય થતા રાજ્યમાં વરસાદી માહોલ છે. તો સાથે જ રાજ્યમાં અત્યાર સુધી સામાન્યથી 46 ટકા વધુ વરસાદ વરસી ચૂક્યો છે.